Beth yw Bysiau’r Arfordir?

Gwasanaethau bysiau lleol yw Gwasanaethau Bysiau Arfordirol Sir Benfro ac maent yn teithio ar hyd yr arfordir, ar saith diwrnod yr wythnos yn ystod yr haf - ac ar dri diwrnod yr wythnos yn y gaeaf. Gyda’r bysiau hyn mae teithiau cerdded, traethau, teithiau cychod, pentrefi ac atyniadau lleol o fewn cyrraedd pawb. Mae 5 ohonynt i gyd, sef
Roced Poppit – gwasanaeth 405
Gwibiwr Strwmbl – gwasanaeth 404
Y Gwibiwr Celtaidd – gwasanaeth 403
Y Pâl Gwibio – gwasanaeth 400/315
Gwibfws yr Arfordir – gwasanaeth 387/388

Pam maent yn gweithredu?

Maent yn helpu pobl leol ac ymwelwyr i deithio i’r arfordir heb orfod defnyddio car. Ni waeth pa ddiddordeb sydd gyda chi, mae gwasanaethau bysiau’r arfordir yn berffaith ar eich cyfer chi!

Sut wyf i’n eu defnyddio?

Gallwch ddefnyddio bysiau’r arfordir i fynd ar siwrneiau ‘mas’ ac ‘yn ôl’ hefyd, neu gallwch deithio mas ar y bws ac yna cerdded yn ôl i’ch man cychwyn. Felly gallwch gerdded ar hyd Llwybr yr Arfordir mewn un cyfeiriad, heb orfod aildroedio’r un llwybr.
Mae’n rhwydd dala bws yn Sir Benfro. Bysiau ‘Galw Cerbyd’ yw pob un o fysiau’r arfordir yn ardaloedd gwledig y sir; felly ’does raid ichi ond rhoi arwydd i’r gyrrwr stopio’r bws. Gall teithwyr fynd ar neu oddi ar y bws mewn unrhyw fan ar hyd ei lwybr teithio – cyn belled â’i bod hi’n ddiogel i’r gyrrwr wneud hynny.

Ble wyf i’n mynd i ddala’r bws?

Bydd y bysiau’n cadw at amserlen, sy’n dangos ble mae’r safle bysiau. Mewn trefi gallwch chi ddala’r bws mewn safle bysiau swyddogol, ond pan ydych chi yng nghefn gwlad, bysiau ‘Galw Cerbyd’ fyddant hwy - sy’n golygu nad oes rhaid ichi fynd at safle bysiau er mwyn dala’r bws. Ewch at yr heol, a rhoi arwydd i’r gyrrwr stopio’r bws wrth iddo nesáu.

Sut fyddaf i’n gwybod ble y dylwn i fynd oddi ar y bws?

Mae ein gyrwyr lleol yn hynod wybodus am yr ardal a byddant yn eich helpu i ddweud yn union ble y dylech chi fynd ar ac oddi ar y bws, ar gyfer mynd ar deithiau cerdded. Byddant hefyd yn gwybod ble mae pen eich siwrnai neu’n gallu argymell un!

Pryd mae’r bysiau ar fynd?

Yr Haf: Bydd holl fysiau’r arfordir ar fynd ar saith diwrnod yr wythnos yn yr haf, rhwng mis Mai a Medi.
Y Gaeaf: Bydd Roced Poppit, Gwibiwr Strwmbl, y Pâl Gwibio a Gwibiwr yr Arfordir yn cadw at amserlen gaeaf o fis Hydref tan Ebrill – pan fydd llai o siwrneiau ar gael.

A yw’r bysiau’n gweithredu’r gaeaf hwn?

Ydynt! Mae pedwar o’r pum bws arfordirol yn gweithredu nawr, sef Roced Poppit, Gwibiwr Strwmbl, Y Pâl Gwibio a Gwibfws yr Arfordir. Maent yn cynnig gwasanaeth cyfyngedig yn ystod y gaeaf, am fod llai o alw bryd hynny – ond maent yn dal i deithio!
Yn ogystal â’r bysiau hyn mae gwasanaethau bysiau lleol yn gweithredu trwy gydol y flwyddyn, gyda gwasanaethau cyfyngedig ar y Sul yn yr haf. Am ragor o wybodaeth gweler isod y ddolen ag ‘Amserlenni Bysiau’

Pryd mae’r bysiau’n gweithredu yn yr haf?

Bydd bysiau’r arfordir yn gweithredu ar saith diwrnod yr wythnos trwy gydol yr haf, gan gadw at yr un amserlen bob dydd. Ie - hyd yn oed ar ddyddiau Sul a Gwyliau’r Banc! Bydd amserlen haf 2008 yn dechrau ar ddydd Sadwrn Mai 3ydd 2008, a bydd amserlenni ar gael yn y Flwyddyn Newydd. Byddant wedi’u hargraffu yn Coast to Coast hefyd.

I ble mae’r bysiau’n teithio?

Bydd gwasanaethau bysiau arfordirol Sir Benfro yn teithio lan a lawr arfordir y Parc Cenedlaethol. Felly gall cludiant cyhoeddus fynd â phobl at unrhyw fan ar hyd Llwybr Cenedlaethol Llwybr Arfordir Sir Benfro sy’n ymestyn am 186 milltir (299km) o Landudoch i Lanrhath.

Beth yw’r pris ar y bws?

Mae’n anodd dodi union bris teithio ichi; gwasanaethau lleol cofrestredig yw bysiau’r arfordir, â phrisiau teithio wedi’u trefnu’n gyfatebol i hynny. Os hoffech wybod beth yw’r pris byddwch cystal â ffonio’r cwmni bysiau’n uniongyrchol; mae’r manylion cysylltu i’w gweld ar yr amserlenni.
Mae pawb sy’n meddu ar Gerdyn Bws Cymru Gyfan yn cael teithio am ddim ar fysiau’r arfordir – does raid ichi ond dangos eich cerdyn i’r gyrrwr.
TOCYN CRWYDRO GORLLEWIN CYMRU - Os ydych chi’n teithio ar b?er o fysiau mewn un diwrnod yna mae Tocyn Crwydro Gorllewin Cymru’n cynnig bargen fendigedig. Mae’r tocynnau’n ddilys ar gyfer teithio trwy’r dydd (un diwrnod yn unig); y pris yw £6.20 i oedolion a £4.20 i blant. Gall plentyn sy’n teithio yng nghwmni oedolyn sydd â Thocyn Crwydro Gorllewin Cymru deithio am £3.15. Gofynnwch i’r gyrrwr bws am Docyn Crwydro Gorllewin Cymru ar y bws cyntaf y byddwch yn ei ddefnyddio ar y diwrnod.
Os ydych chi’n bwriadu defnyddio cludiant cyhoeddus i deithio i Sir Benfro ac y byddwch chi’n gwneud defnydd helaeth o fysiau a threnau er mwyn teithio o amgylch, yna beth am PAS FFLECSI CRWYDRO CYMRU? Mae pob un o fysiau’r arfordir yn ei dderbyn. Mae dolen i’w gweld isod.

Ble allaf i gael amserlen bysiau?

Mae holl amserlenni bysiau’r arfordir ar gael i’w lawrlwytho a’u hargraffu oddi ar y wefan hon. Cliciwch ar ‘Amserlenni’ yn adran cludiant cyhoeddus. Os hoffech inni anfon taflen amserlenni atoch trwy’r post, byddwch cystal ag anfon e-bost at Lonydd Glas Sir Benfro: greenways@pembrokeshire.gov.uk

Sut allaf i gerdded ar hyd Llwybr yr Arfordir heb gar?

Mae’n rhwydd! Dewch i Sir Benfro ar y trên, bws neu fferi ac yna defnyddio’r bysiau i fynd ar hyd y fan. Mantais defnyddio bysiau’r arfordir yw y gallwch chi gerdded ar hyd Llwybr yr Arfordir mewn un cyfeiriad heb orfod becso am fynd i mo’yn y car ar derfyn y dydd. Trwy ddefnyddio’r bysiau i fynd lan a lawr yr arfordir gallwch chi aros yn eich llety am ragor o nosweithiau. I gael syniadau am deithiau gweler adran ‘Llwybr yr Arfordir’.

Gaf i ddod â’m ci ar y bws?

Cewch, mae croeso i’ch ci deithio ar y bws (os yw’r gyrrwr yn cytuno) cyn belled â bod eich ci’n lân, ar dennyn a’i fod yn eistedd ar y llawr a mas o ffordd y teithwyr eraill. Da chi – byddwch yn berchennog cyfrifol ar eich ci a glanhewch ar ôl eich anifail anwes – a gadael dim ond olion pawennau os gwelwch yn dda!

Allaf i ddod â’m beic ar y bws?

Yn anffodus, does gyda ni ond un bws sy’n cludo beiciau, ond mae Lonydd Glas am wella pethau at y dyfodol. Gall Gwibfws yr Arfordir, sy’n teithio o Benfro, gludo: 2 feic, byrddau brigdonni ac 1 cadair olwyn. Erbyn hyn gallwch chi gadw lle i’ch beic – ymlaen llaw – cyn teithio ar y bws trwy ffonio Cwmni Bysiau Silcox ar: 01646 683143 (Llun-Gwener, yn ystod oriau swyddfa).
Cofiwch – gallwch chi fynd â beiciau ar drenau hefyd: 2 feic ar Trenau Arriva Cymru a 6 beic ar Drenau First Great Western.

Rydym ni’n gr?p mawr – allwn ni fynd ar y bws?

Os yw’ch gr?p yn cynnwys 8+ o bobl a’ch bod yn dymuno defnyddio bysiau’r arfordir yna byddwch cystal â chysylltu â’r cwmni bysiau priodol cyn teithio, er mwyn cael gair am eich trefniadau teithio (Llun-Gwener, yn ystod oriau swyddfa). Mae rhifau’r cwmnïau bysiau i’w gweld ar yr amserlen bysiau.

Mae bws cymunedol Bloomfield i gerddwyr yn gallu cludo cerddwyr o Arberth i’r ardal hardd oddi amgylch. Mae’r gwasanaeth hwn yn gweithredu bob dydd Sul o ddechrau mis Mai tan ddiwedd mis Medi

Cwestiynau Cyffredin.